La serĉado pri
libera interspaco por parkumado senesperigas multajn aŭtomobilistojn. Sed
estonte elektra aŭtomobilo kiu per butonpremo kunfaldiĝas povus plifaciligi al
ili la vivon. Ĝi devenas el Israelo sed la produktantoj celas ankaŭ la eŭropan
merkaton.
Por solvi je
longa vido la problemon de mankanta spaco por parkumado en urboj, israela
novteknologia entrepreno disvolvis faldeblan elektromobilon. La veturilo
"City Transformer" havas bazan konstruaĵon kiu per butonpremo plilarĝiĝas
aŭ inverse. En faldita stato la veturilo havas larĝecon de nur unu metro kaj do
senprobleme estas enŝovebla en parkumejo por motorciklo. En malfaldita stato ĝi
havas larĝecon de 1,4 metroj kaj tiel havas la samajn proporciojn kiel normala
aŭtomobilo. Ĝi atingos laŭ indikoj de la produktanto rapidecon de 90 km/h.
La baterio de la
elektromobilo estas ŝargebla hejme aŭ ĉe publikaj ŝargstacioj. Nuntempe per unu
ŝargo de la baterio ĝi atingas distancon de 150 km. "Ni kalkulas tamen ke
ĝis la amasa produktado de la elektromobilo disponeblos pli bonaj kaj pli efikaj
baterioj", diras Udi Meridor, la estro de la disvolva fako de la israela
entrepreno.
La fina
prototipo de la elektromobilo laŭ indikoj de la produktanto estu lanĉata post
10 monatoj. Tiam ankaŭ startos la oficiala antaŭmenda kampanjo. Post 10.000
antaŭmendoj la elektromobilo estu produktata en muntoĉeno, proksimume en la
jaro 2020 je la prezo de 8785 eŭroj.
La elektromobilo
servu tiam por privata uzo kaj por kundivida uzo - unue en Telavivo, poste
ankaŭ en eŭropaj kaj aziaj urboj. Versio de la aŭtomobileto servos aparte por
entreprenoj. Ĝi povos transporti varojn ĝis maksimume mil kilogramoj. Krome laŭ
la produktantoj la aŭtomobilo povus esti helpilo en malfacile alireblaj
regionoj aŭ en homamasoj - ekzemple por medicinaj unuahelpantoj.
Sed oni ofertos
ankaŭ versiojn kiuj celas la privatan uzon kaj por familioj kun du sidlokoj
malantaŭe.
La koncepto
povus laŭ takso de germana fakulo pri aŭtomobilismo esti sukcesa ankaŭ en la
germana merkato. "Precipe en urbegoj la parkumeja problemo kreskos.
Malabundiĝos la disponeblaj spacoj kaj la kostoj plialtiĝos. Do antaŭvideble
pli da tiaj konceptoj aperos sur la stratoj." Sed por vere sukcesigi la
koncepton pri faldebla elektromobilo necesas trovi ĉefan merkaton por ĝi en la
kundividado de aŭtomobiloj kun ekstreme malaltaj porkilometraj kostoj.
Nenhum comentário:
Postar um comentário