Kiu havas
ideojn, sed ne havas monon por la realigo, tiu povas iri al la banko - aŭ povas
serĉi la ĝustajn sponsorojn. Kelkfoje jam sufiĉas kelkaj pagemaj privatuloj por
la financado. La sukceso ĉe la amasfinancado tamen dependas de la preparoj.
"Al ni
estis relative klare, ke ni ne iros al la banko", rakontas la estro de
nova malgranda radiostacio en la germana urbo Lepsiko. "Ni volis produkti
matenan programon kun interparoloj", li klarigas. Kaj por tio necesis
mono, nome 50.000 eŭroj. Sed tiu mono mankis al la stacio. "Ni pensis: Ni
do demandu la geaŭskultantojn, ĉu ili bontrovas tion - kaj ĉu ili estas pretaj
pagi ion por tio."
La aŭskultantoj
konsentis kaj amasfinancis la novan matenan elsendon. Ĉe tiu nova maniero de
monkolektado kiun oni povas ankaŭ nomi svarmfinancado, la svarmo - do certa
nombro da homoj, donas monon por projekto, por ideo, por vizio. Oni prezentas
tion plej ofte sur apartaj platformoj en la interreto.
La koncepto
funkcias tiel: Subtenantoj donas certan sumon kaj tiel akcelas la realigon de
la projekto. Fine ili ricevas novan produkton, ekzemple radioprogramon aŭ
bileton por kinofilmo por la tiel finance akcelita filmo. Oni povas distingi
inter tri formoj de amasfinancado:
- la financintoj ricevas iun dankan bonuson - ekzemple
kinobileton,
- la financintoj
donacas la monon kaj rericevas nenion,
- la financintoj
ricevas interezojn.
Multaj projektoj
ne sukcesas atingi la starigitajn celojn aŭ malsukcesas ĉe la realigo. Necesas
aktivigi la propran socian reton. Nur se certa amaso da donacoj estas atingita,
tiam ankaŭ pli da homoj estas pretaj doni sian monon. La sojlo de engaĝiĝo situas
ĉe proksimume 70 procentoj de la investota sumo. Tiam pli da homoj vidas la
projekton sur la platformo kaj pli emas doni monon.
La donaco ĉe
normala amasfinancado estas senriska: Se la celita sumo estas maltrafita, ĉiuj
donacintoj rericevas sian monon.
Sukcesaj
kampanjoj kolektas du kvinonojn dum la unua semajno. Amasfinancado povas esti
bona alternativo se mankas propra kapitalo aŭ se la banko trovas la ideon tro
nebuleca aŭ se la disvolvita koncepto ankoraŭ ne estas tiom matura ke
investanto aliĝas al ĝi.
Ĉe la
amasfinancado la plej granda motivo por doni monon ne estas la interezoj, sed
la emo partopreni en komunumo. La prezento de projekto sur amasfinanca
platformo estas bona testo de la merkato. Kaj oni ricevas de la komunumo de
donacantoj kelkfoje valorajn konsilojn por la disvolvado - kaj krome faras
reklamon por la produkto.
Kiu sukcese
volas kolekti monon, tiu devas atenti pri kelkaj aferoj. "Oni devas
rakonti kiun avantaĝon la homoj havos, se la afero funkcias", diras la
estro de radiostacio. Al tio apartenas ankaŭ ke necesas komuniki prokrastojn aŭ
klarigi partajn celojn. La kampanjo devas esti aŭtentika kaj travidebla. La
sukceso dependas je 80 procentoj de la preparoj: Kiel mi interesigas homojn por
mia ideo? Pri kiuj kostoj mi devas kalkuli? Kion mi povas doni kiel dankaĵon?
La ideala daŭro
por kampanjo situas ĉe 40 tagoj. En la mezo de la donaca fazo - la tiel nomata
"valo de larmoj" - oni devas havi planon kiel oni tenas la projekton
en diskutado. Laŭ spertoj je la komenco kaj antaŭ la fino de la donaca fazo
fluas plej multe da mono. Kaj oni zorge elektu la dankaĵ-artiklojn. La homoj
preferas ion kio rilatas al la posta produkto. Ĉe la radiostacio en Lepsiko la
donacintoj plej ŝatis simplan tason kun la logotipo de la stacio.
Nenhum comentário:
Postar um comentário