Moviĝado kaj
sporto tenas ne nur la korpon kapabla - ankaŭ la cerbo profitas de tio. Japana
studaĵo nun montras: Ne necesas plenumi alte produktivan trejnadon. Jam post
dek minutoj da leĝera aktiveco montriĝas pliboniĝoj.
Sporto tenas la
cerbon kapabla, tio estas konata. Laŭ japana studaĵo jam tre leĝera trejnado
kiel promenado, jogo aŭ taj-ĉio povas sufiĉi por aktivigi la memoron, kio tiel
povus helpi en la batalo kontraŭ malsaniĝoj de demenco kiel alchejmero.
Esploristoj de la universitato de Tsukuba raportas en usona faka ĵurnalo ke
testpersonoj jam post dek minutoj da leĝera aktiveco montris pli bonajn
rezultojn en memorekzercoj.
"Moviĝado
alportas benon" estas germana parolturno kiu ŝajnas ankaŭ esti valida por
niaj kognaj kapabloj. Multaj studaĵoj pruvas la pozitivajn efikojn de korpaj
aktivecoj pri nia cerbo. Sed kiom necesas ŝviti por tio?
La esploristoj
de la universitato de Tsukuba pristudis la efikon de tre leĝera senstresa
trejnado pri nia memoro. Tiucele ili igis 36 sanajn testpersonojn en la aĝo de
proksimume 20 jaroj treti dum dek minutoj sur kuŝergometro. Post tio la
testpersonoj plenumis diversajn memortaskojn.
Ĉe parto de la
grupo krome estis faritaj skanaĵoj de la cerbo por kontroli la aktivecon en la
hipokampo. Tiu parto de la cerbo estas ĉefe respondeca por la memorkapablo kaj
apartenas al la limba sistemo. Laŭ kreskanta aĝo ĉe la homo la hipokampo
ŝrumpas, kaj per tio sekve malboniĝas pensaj kaj memoraj procezoj. Studaĵo de
la universtitato de Pittsburgh montris jam en la jaro 2011 ke regulaj leĝeraj
aerobikaj sportekzercoj kondukas al relativa pligrandiĝo de la hipokampo.
Kiel la
sciencistoj de la aktuala studaĵo montris, sufiĉas jam mallonga unuo de sporto
sur la kuŝbiciklo por plialtigi la konektivon inter la tiel nomata gyrus dentatus
en la hipokampo kaj la cerba kortekso. En la gyrus dentatus ekestas ĉe la homo
ĝis la plenkreska aĝo novaj nervoĉeloj, koresponde al tio tiu regiono estas
grava por la fleksebleco de la cerbo - kaj tio validas supozeble ĝis la alta
aĝo. Ju pli alta estas la konektivo, des pli bonaj estis laŭ la esploristoj la
rezultoj en la memorekzercoj.
Restas tamen
malklare kiuj molekulaj, sinapsaj kaj ĥemiaj procezoj en la cerbo estas
stimulataj per la leĝeraj movoj. Por tio laŭ la esploristoj necesas sekvaj
esploroj.
Nenhum comentário:
Postar um comentário